Fѐis Rois na h-Òigridh

Tha sinn air atharrachaidhean brosnachail a dhèanamh ri prìomh-thachartasan na Fèise ann an 2023 agus tha sinn toilichte prògram Fèis a’ Ghiblein a nochdadh dhuibh.  An àite an tachartais-chòmhnaidh àbhaistich, tha trì tachartasan neo-chòmhnaidh air leth gu bhith againn ann an Ulabul, ann an Inbhir Pheofharain agus ann am Baile Dhubhthaich.

Gabhaidh Fèis na h-Òigridh againn àite bho 3 gu 6 Giblean agus tha i fosgailte do dh’aoisean Bun-sgoil 4 gu Àrd-sgoil 6.

Tha sgioba mìorbhaileach againn de dh’oidean ann an gach tè de na trì làraichean; is gheibhear gach fiosrachadh mu sheiseanan-teagaisg, àiteachan agus mar a ghlèidheas sibh àite air na cluasan a leanas air an làraich-lìn seo.

Cuideachd tha sinn a’ cur air dòigh cèilidh coimhearsnachd anns gach àite: Dimàirt ann an Ionad Dhubhthaich, Baile Dhubhthaich, is na dhèidh Diciadain ann an Talla Baile Ulabul, agus Diardaoin ann an Talla Baile Inbhir Pheofharain. Bidh na tachartasan seo fosgailte do luchd-com-pàirt is do an teaghlaichean is cuideachd do mhuinntir an àite fhèin, agus ‘s e cothrom a bhios ann dhuibh ur n-oidean a chluinntinn a’ cluich.

Do luchd-compàirt à Baile Dhubhthaich is à Ulabul as urrainn siubhal a dh’Inbhir Pheofharain, ‘s e cothrom a bhios ann cuideachd na tha sibh air ionnsachadh feadh na seachdain a chluich. Bidh tuilleadh fios mu na tachartasan seo a’ tighinn a dh’aithghearr.

Prìsean & Clàradh

Tha sinn air cumadh nan tachartasan seo atharrachadh gus an dèanamh nas saoire do theaghlaichean agus gus an cunnart a lughdachadh gun caill Fèis Rois airgead orra aig an àm seo. Gun a’ chosgais a bharrachd an lùib tachartas làn-chòmhnaidh a chumail, ‘s urrainn dhuinn an t-seachdain seo fhàgail na thachartas “pàighibh na ‘s urrainn dhuibh”.

Chì sibh ceithir roghainnean pàighidh, a’ tòiseachadh aig “Cha tèid agam air rud sam bith a phàigheadh agus bu thoigh leam àite an-asgaidh fhaighinn.” Ma ‘s urrainn dhuibh barrachd a phàigheadh, an uair sin tha roghainnean agaibh £50, £75, no £100 a phàigheadh. Tha £100 a’ riochdachadh cosgais £25 san latha airson teagasg bho 10m.-3.30f.

Tuigidh sinn nach tèid aig cuid a dhaoine air pàigheadh nan àiteachan sin. Tha sinne ag iarraidh gun tèid aig gach pàiste air brath a ghabhail air a’ chothrom seo, agus faodaidh sibh an roghainn pàighidh a fhreagras oirbh a thaghadh.

Thoiribh an aire gum bi Fèis làn-chòmhnaidh againn ann an Ulabal bho 16-23 Damhair, 2023 air an aon dòigh air a bheil sibh eòlach, agus gu bheil sinn air na prìsean a reòthadh aig an aon ìre ri 2022. Bidh an tachartas seo fosgailte cuideachd do dh’òigridh bho Bhun-sgoil 4 suas gu Àrd-sgoil 6. Bidh clàir-theagaisg againn air an aon ruith los gum bi Bun-sgoil 4-7 còmhla, Àrd-sgoil 2-6 còmhla agus gum faod Àrd-sgoil 1 taghadh co còmhla ris a thèid iad. Bidh gnothaichean conaltraidh is amannan-bìdhe diofraichte aca agus fuirichidh iad còmhla ri òigridh a tha den aon aois is den aon ghnè riutha. Agus gu dearbh – ‘s e a’ bhuil a tha ann gur urrainn don chloinn agaibh tadhal air dà Fhèis Rois ann an 2023 an àite aon tè!

Tha a h-uile oide againn nan neach-ciùil proifeiseanta, comasach is fiosrach agus aig a bheil eòlas air a bhith ag obair le òigridh. Tha sgioba de luchd-stiùiridh is luchd-obrach saor-thoileach againn cuideachd a chuidicheas le bhith a’ ruith nan tachartasan againn. Tha an òigridh fo stiùir an luchd-obrach fad an t-siubhail agus bidh sinn ag obair a rèir nan Stiùiridhean airson Dìon Chloinne is Slàinte is Sàbhailteachd. Tha a h-uile neach-obrach againn nam ball den Sgeama PVG a tha air a ruith le Foillseachadh Alba.

Tha e na dhealas dhuinn ceòl traidiseanta a dhèanamh fosgailte dhan h-uile duine. Nam bu toigh leibh bruidhinn rinn, an diomhaireachd, air taic dha luchd-ionnsachaidh le feumalachdan no air so-ruigsinneachd shònraichte dha ur cuid chloinne, chan eil agaibh ach fios a chur gu Fiona no innse dhuinn air an fhoirm chlàraidh.

It was great fun. The tutors were kind and I made lots of friends.

2017 participant